معانات طفل
إيتاليكا - 13\12\2010
كم مشكلي بحياتهن عملو منا معاناة.. لك شو بقول اني؟!!
بعدني طفل صغير وصرت شايف منهن شي بيشيب شعر الراس.
بتفيقك امك الصبحيات متل يلي عاملتلك جميلي على يل استعجل اسا بتتاخر.. فوت عالحمام
.. نزل السيفون وما تلت الكرسي.. غسل وفرشي اسنانك ولبيس اواعيك وشراب كاسة الحليب
ولا تنقط.. بعدك حافظ المادي .. ركز بالامتحان.. يا ويلك اذا ما بتجيب ميي.. لبيس
باجرك برا ولا تتلهدن عالطريق.. ورجاع دغري عالبيت لا تمييل لهون ولهون لان بدي قول
لببيك اذا تأخرت.. وبتقفي من قدامها وصوت توصياتها لاحقك..
بترجع من المدرسي هلكان بتدق الباب.. بتحاكيك امك من المطبخ.. شلاح من اجرك برا
وغلوق الباب وراك .. حط شنتك محلها وفوت غسل ايديك لان الطريق مليان جراثيم واسا
بتمرض يا ماما.. غيير اواعيك وكتوب وظايفك عبين ميجهز الغدا..
بيجهز الغدا وبيحول بيي من الشغل.. بنقعد لنتغدا سوا لانو ها الوقت الوحيد يلي
منجتمع فيو بغرفي وحدي.. وكل الوقت عمناكل وامي عايشي عاعصابها وعبتحاول تراقبنا
مشان ما نحكي ولا نتصرف أي تصرف يزعج البابا.. وبابا قاعد عمياكل وهوي معبس.. مزعوج
الله اعلم من شو.. وان حكا شي كلمي بيكون بس انتقاد.. على لا تتلقمس.. ولا تشربل..
ولا تاكل من الشختورة.. الك صحن حط في شو بدك وكول.. بيخلص الاكل وبتقوم امي تجلي
وترتب وبيي بيقعد قبال التلفزيون ومش معبر حدا وكل الوقت عميصرخ فينا لك سكتو..
صرعتوني.. ليش عامللكن اوظة لحالكن اني روحو لعبو فيها.. بدي اسمع الاخبار.. واذا
اجا عبالي احكي معو او استشيرو بيقلي: اسا مش رايق وعبحضر برنامج مهم..
واذا عبالو ينام شوي .. بتاخذنا امي مشوار مشان ما نزعجو.. واذا بدو يفل من البيت
امي بتستغل الفرصة وبترن لفيقتها مشان يدردشو شوي عاساس مش عبتشوفها يعني.. وهي
اغلب الوقت معها.. واذا اجيت انا بدي احكي معها بتقلي: بس كون قاعدي مع رفيقتي خليك
باوظتك اني بقعدش مع رفقاتك بس يجو.. والحقيقة يا امي.. انو انتي كل الوقت مش
فاضيتيلي يا عبتطبخي يا عمتشتغلي يا بيي بالبيت يا اما انتي ورفيقتك.. وما في وقت
لنتحاور سوا..
يعني ما بكفي قديش عمنقضي وقت بالمدرسي وعمنشتاق للبيت.. بس نجي عالبيت منقرف البيت
وساعتو لانو ما عمنقدر نرتاح فيه.. يعني اهلينا اذا مو قادرين يرتبو وقت قصير
ليقعدو في معنا يناقشونا .. يسألونا.. يشوفو شو ناقصنا غير الكمبيوتر.. وغرفة النوم
والالعاب.. والكتب التعليميي والترفيهيي.. والرحلات يلي عميبعتونا عليها.. وغير كل
الاشياء يلي مغرقينا فيها.. يعني كيف بدهن يفهمو انو نحنا ناقصنا وجودهن معنا
والمشاركي والحوار والتعاون الاسري يلي عاساسو انبنا البيت.. يعني اذا مو قادرين
يقدمولنا ابسط الامور اللي هيي شوفتهن مكانو عايشين لحالهن ومبسوطين شو كان بدهن من
وجع القلب ووجع الولد كمان؟